Отбасылық зорлық – зомбылық пен кемсітушіліктің алдын алу, абьюзер

Отбасы – қауіпсіздік пен мейірім мекені болуы тиіс. Алайда кейбір жағдайларда отбасы ішіндегі қысым, қорқыту, кемсіту мен күш көрсету адамның психологиялық және физикалық саулығына зор зиян келтіреді. Зорлық-зомбылық – бұл жеке мәселе емес, бұл – қоғам мәселесі.

Отбасылық зорлық-зомбылық тек ұрып-соғумен шектелмейді. Ол психологиялық қысым жасаудан, үнемі бақылауда ұстаудан, қорқытудан, кемсітуден, қаржылай тәуелді етуден басталуы мүмкін. Көп жағдайда жәбірленуші адам мұны бірден аңғармайды, себебі абьюзер өз әрекетін «қамқорлық», «қызғаныш», «тәртіп» деген сөздермен ақтауы мүмкін.

Абьюзер – бұл басқа адамды жүйелі түрде бақылап, еркіндігін шектеп, өзін төмен сезіндіретін, қорқытып немесе манипуляция арқылы басқаруға тырысатын тұлға. Мұндай адам кінәні әрдайым өзгеге артады, кешірім сұраса да әрекетін қайталайды, жәбірленушіні қоғамнан оқшаулауға тырысады. Бұл – қауіпті мінез-құлықтың белгісі.

Қазақстан Республикасында әр азаматтың қауіпсіз өмір сүруге құқығы заңмен қорғалған. Негізгі құқықтық негіздер қатарында Қазақстан Республикасының Конституциясы және Тұрмыстық зорлық-зомбылықтың алдын алу туралы заң бар. Заң зорлықтың кез келген түріне жол бермеуді және жәбірленушіні қорғауды көздейді.

Зорлық-зомбылықтың алдын алу үшін ең алдымен құқықтық сауаттылықты арттыру, балаларды құрмет пен теңдік құндылықтарына тәрбиелеу, агрессиясыз қарым-қатынас мәдениетін қалыптастыру маңызды. Егер зорлық фактісі орын алса, оны жасыру емес, тиісті органдарға хабарлау қажет. Үндемеу – мәселені ушықтырады.

Құрмет, сенім және қауіпсіздік – бақытты отбасының негізі. Зорлық – норма емес. Әрбір адам қадірлі және қорғалуға лайық.